OLENTZERO IGARTUBEITIN

Abenduaren 20 arratsaldean, Olentzero iritsi zen Igartubeitira txikitxoen eskari eta gutunak jasotzera Ganbara guraso elkarteak udalarekin batera antolatuta.
Arratsaldearen lehen zatian Ixabel Millet ipuin kontaliaren eskutik ipuin kontaketa bat entzuteko aukera izan zuten igartubeitira gerturatu ziren haur eta helduek.

Ipuin kontaketa adi adi jarraitu eta hau , garaion aldetik, su argiz lagunduta olentzero zetorrela ikusI ahal izan zuten. Berehala iritsi zen bertara,laguntzaile eta guzti eta baserriko atarian astoa lotu ondoren barrura sartu ziren, txikienek olentzerori gutunak eman eta beraien nahien berri eman ahal izateko. Oraingoan ere olentzero saritxoekin etorri zen eta bertaratutakoei goxokiak banatzen aritu zen.

Eskaera guztiak jaso eta denei txintxo portatzeko agindua eman ondoren, berriz ere mendi alderako bidea hartu zuen Olentzerok eta gainontzekoek, Juan igartuerdikoak danbolinean egindako gaztaina erreak eta txistorra jateko aukera izan zuten arabako ardo eta Igartubeitin bertan egindako sagardoaz lagunduta.

ESKOLA TXIKIAK, HERRITARREI HARRERA

Abenduaren 20an, Ezkio-Itsasoko Eskola eta Udalak antolatuta herritarrei zuzendudako harrera ekitaldia antolatu zuten.
Ikasturtea irailean hasi bazen ere, eskola berria herritarrei erakutsi eta bertan herritarrak eskuzabalik hartzea zuen helburu.
Eguerdian eskolako haur eta irakasleek eman zioten hasiera ekitaldiari kantu eta dantzekin. Ondoren etorri ziren udalaren, irakasleen eta guraso elkarteko ordezkarien azalpen eta esker oneko hitzak.

Egun honetarako bereziki prestatutako bideo bat ikusteko aukera ere izan zuten bertaratutakoek. Bertan, gaur egun eskolan dauden haurren eta egiten dituzten ekintzen argazki bilduma bat ikusteko aukera izan zen, alkatearen, irakasleen eta guraso elkarteko lehendakariaren azalpenez lagunduta.

Ondoren alkateak eskola berriaren proiektua eta egingo diren obren nondik norakoak azaldu zituen. Pozik ikusi ziren batez ere gaur egun ikasle-irakasle-guraso direnak, baina baita beraien eskola berria izango dena ezagutzera gerturatu zirenak ere.Eskolarekin lotura zuzena ez duten herritar ugari ere pozik azaldu zen; herriarentzat ere eskola izatea oso garrantzitsua bait da.

Ekitaldiaren amaieran, beheko aretoan mokadutxo bat hartzeko aukera ere izan zen eta bertan ikusi ahal izan genituen eskolako logo eta izen lehiaketara aurkeztu ziren lanak ere.

DURANGOKO AZOKA ETA ARRIKRUTZ

Abenduaren 6an, eguraldi kaxkarrari aupegi ona jarriaz laguntalde batek, Yartuk antolatutako irteeran parte hartu zuten. Udaletxe aurretik irten autobusez eta Durangon liburu eta diska azokan bueltatxo bat emateko aukera izan zuten musika eta literatura nobedadeetan murgilduz.
Eguerdi aldera, autobusa hartu berriz ere eta Oñatin, Arantzazura bideko jatetxe batean bazkaldu ondoren inguruan dauden Arrikrutzeko kobetan barna bisita gidatua burutu zuten.
Egun atsegina pasa eta iluntzerako etxeratu ziren.Dagoeneko hurrengo irteeraren zain geratu da jendea.