SAN JUAN BEZPERA 2017

Aurtengo San Juan bezpera eguna ere mundiala izan dugu. Jende ugari hurbildu zen eta festa giroan pasa genuen iluntze-gaua.

8,30etan elkartu eta eliz atarian egin genuen sorgin-afaria adin guztietako herritarrak elkartuta.

Afalostean SUAren festari eman genion hasiera kanpaiak dilin-dalan joaz eta suziriak zeruratuz. Txalapartak ttakun-ttakun girotu zigun Ezkioko eliz aurrean dagoen plaza eta bitartean Igartuerdiko Juanitak ekarriko sortarekin bedeinkazio laikoa eman genien inguratuei.

Haurrekin, kolerako kea botatzen zuten su txikiak piztu genituen

eta… ondorenean plazan prestatuta geneukan metari su eman genion. Metan bertan Herri Eskolako haurrek ekarritako panpin bat ere bazegoen EMAN ESKERRAK IRAGANARI ETA ESAN ONGI ETORRI ETORKIZUNARI, BAINA BIZI ETA GOZA ORAINA. GORA BIHOTZAK!! mezuarekin. Mila esker eskolako irakasle eta ikasleei ere!!!

Sua piztu ondoren, sorgin eta sorgin-txikiak dantzan aritu ziren. Nabari zen entseguak eginak zituztela, a zer nolako sasoia erakutsi ziguten eta a zer giroa jarri ziguten!! Suaren epeltasunaren inguruan gustura genbiltzala “keimada” eta txokolate beroa eskaini zituen Yartu Kultura Elkarteak bertaratuentzat.

Sua apaltzen hasi zenean, saltorako gogoa zeukanik ere agertu zen!!

 



KORRIKA EZKION

Apiralaren 8an, goizaldera pasa zen Korrika nagusia Ezkiotik herrian 3 kilometro eginez.

1. kilometroa Udalak erosi zuen eta lekukoa Ander eta Iñaki zinegotziek eraman zuten. 2.kilometroa herriko elkarteen artean erosi zen; Yartu Kultura Elkartea, Herri Eskola, Ganbara Guraso Elkartea, Anduaga Elkartea eta Oreina Ehiztari Elkartea. Lekukoa, Joxemari eta Mikelek partekatu zuten.

3. kilometroa herritar eta ostatuen borondatezko ekarpenekin erosi ahal izan zen eta lekukoa herriko gazteek partekatu zuten; Itziar, Alaitz, Garazi,…



ARGAZKI LEHIAKETAKO SARI EMATEA

Udazkenean abiatutako argazki lehiaketari martxoan eman genion amaiera sari banaketarekin. Aurtengoa III. edizioa izan dugu, bi urtetik behin gutxi gora behera antolatzen bait du sariketa hau Yartu Kultura Elkarteak.



SANTA ESKEA 2017

 

Aurtengo santa eskea jendetsua eta festa girokoa izan dugu.

Talde bikaina elkartu zen otsailaren 4 iluntzean Ezkion,Eneko Dorronsoro eta Iñaki Larrñagaren trikiti eta pandero doinuez lagunduta, bertatik hasi bait zen aurtengo ibilaldia.

Ezkioko ostatuan abestu eta indarrak berritzeko txistorra mokadutxoa hartu ondoren Santa Lutzin egin zuten hurrengo geldialdia. Hemendik Etxeberrialde/Mirandara egin zuten salto eta hemen sorpresa atseginarekin egin zuten topo. Kopla zahar eta berriak abestu ondoren, Mirandan ere ongi-etorria prestatuta zeukaten!! Iazko sustoa eta larrialdiak ahazteko mokadutxo goxoa eskaini zioten taldeari. Mila esker benetan!!!

Etxeberrialdetik barna, Errekabarrenan eta Iturgainen egin zituzten geldialdiak kopla kantari eta aurtengo ibilaldiari eskola azpiko Topa tabernan eman zioten amaiera. Hemen ere kantu saioa egin ondoren,  festa giroak goizeko ordu txikiak arte jarraitu zuen bertako jangelan afari, kantu,dantza eta kontuekin.

Hurrengo urtean berriz!!!!

 



BRASIL

p1100626 Joan den azaroaren 26an, Hego Ameriketako herrialde zoragarri hau ezagutzeko aukera izan genuen.

Aritz Zumarraga Ezkiotarrak eta Alexandre De Souza Brasildarrak eskaini ziguten hitzaldia.Aritzek euskeraz egin zigun eta Alexandrek gazteleraz, baina eskertzekoa da Euskerazko hitzak esateko egindako ahalegina.



DEKORAZIO TEKNIKEN IKASTAROA

Uztaileko 3 ostiral arratsaldetan, dekorazio teknika desberdinak ikasteko ikastaroa izan dugu udaletxe azpiko aretoan.

Jende gehiagok izena eman eta interesa azaldu bazuen ere, adostutako ordu eta egunetan 9 lagunek izan dute posible bertaratzea. Maite Fernandez eta Helena Herreros izan teknika hauen irakasle.

Batetik, transfer teknika erabiliz, egurrezko ohol zatiak dekoratzen ikasi dute eta bestetik kristalezko potoak dekoratzen.

Denboraz motz xamar geratu bazaie ere gustora aritu dira ikasleak, eta oso lan politak egin dituzte. Hurrengo ikastaroan gehiago!!



LAPURDIKO KOSTALDEA EZAGUTUZ

Ez da lehenengo aldia, Fermin Leizaolaren gidaritzapean, Iparraldea ezagutzeko irteera egiten duguna, baina oraiangoan ere izan dugu zer ikusi eta zer ikasi.

Ia 40 laguneko taldea izan ginen pasa den uztailaren 16an, Lapurdiko herri eta txoko desberdinak bisitatu eta bertako historia eta istorioen azalpenak jasotzen.

Lehenengo geldia Urruñan egin genuen, eta bertako parrokia ikusteaz gain, Sokorriko Amaren ermita ere bisitatu genuen.

Ondoren etorri ziren Azkaine eta Sarako bisitak. Saran indarrak berritzeko geldialditxoa egin eta Senpere, Ahetze, Bidarte,  Donibane Lohitzune eta Hendaia ikusteko aukera izan genuen.

Eguraldia lagun, primeran pasa genuen!



ERAKUSKETA SANTA LUTZIAN

Aurtengo San Pedro festetan, erakusketa zoragarria ikusteko aukera izan dugu Udaletxe azpiko aretoan. Bertan aspaldiko argazki eta gauza desberdinak izan ditugu ikusgai.

Oso harrera ona izan du eta jende ugari hurbildu da bisitan. Argazki zaharretan falta ziren datu batzuk ere jaso ahal izan dira.

Mila esker Junkali antolaketarako gidaritza lanengatik, baina baita erakusketarako gauzak utzi, erakusketa prestatzen lagundu eta nola ez ,ikustera hurbildu zareten guztioi!!



SAN JUAN BEZPERA

Urtero bezala, eta iluntzeko eguraldi kaxkarrari aurre eginez, 70 lagun inguru elkartu ziren su-festaren aurretik afari merienda egitera eliztarian horretarako prestatu zeuden mahaitera. Afari legea, bakoitzak berea antolatzen bazuen ere, Igartubeitiko sagardoa edateko aukera izan zen Yarturen eskutik.



BOLI, BILI,BOLI

P1080904 Apirilaren 23an, Ganbara Guraso Elkartearekin batera, BOLI, BILI, BOLI antzerki emanaldia izan genuen Zanpart Teatro taldearen eskutik.  Juan Kruz Igarabideren ipuin eta olerkietan oinarritutako emanaldia izan zen txiki eta ez hain txikiak adi-adi mantentzea lortu zuena.